-
الأستاذة يسر الدريدي-أستاذة بالمعهد التحضيري للدراسات الأدبية والعلوم الإنسانية بتونس تتحدّث عن تجربتها ورؤاها في ملفّ التوجيه الجامعي للدراسات التحضيرية الأدبية والعلوم الإنسانية من منطلق تجربتها كأستاذة وكطالبة سابقة بالمعهد.
- كل عام الوقيّت هذا يجيوا برشا بنيّات و وليدات ناجحين في الباكالوريا يطلبوا النصيحة فيما يخصّ التوجيه للمعهد التحضيري للدراسات الأدبية و العلوم الإنسانية بتونس، المعروف بمسمّى "بريبا القرجاني"، و تداوليّا (و بمعزّة كبيرة والله، باش ما نتفهمش بالغالط مرّة أخرى، خاطر مستحيل حدّ ينجّم يحب البلاصة هاذيكا قد ما نحبها ٱنا) "خربتنا العزيزة".
بصفتي قريت و نجحت غادي، و رجعت نقرّي (و نحاول ننجح) غادي زاده، ما نحبّش نؤثّر على حد في اختيارو. ٱنا نعتقد (اعتقاد يلزمني وحدي) حتّى لتوّه اللي المؤسسة هاذيكا هي "الأفضل في الممكن" في تونس في مجال اللغات و الانسانيات و ماذابيّ تبقى ديما تستقطب طلبة موش "قرّايين" كهو، ٱما ""يحبّوا" قرايتهم.لكلّ ناجح بتميّز في الباكالوريا (سواء في شعبة علمية أو أدبية)، عندي 4 نصائح:
1- ماتجيش للڨرجاني إذا ماكش "مغروم" بالتخصص اللي تحب تقرأه. الشّغف أكثر من نصف النجاح. الشغف هو اللّي يخلّيك تصبر عالنسق المرهق متاع الخدمة و ماتسلّمش كي تعكس معاك ماللّول. الشغف هو اللّي يخلّيك ديما تحبّ تتعلّم و تتحسّن. الشّغف هو اللّي يخلّي كتيبتك و تفكيرك مميّز و عندو طابع خاصّ، موش قالب standard ما فيه حتى شخصية و حتّى طرافة.
2- ماتجيش للڨرجاني و انت ماتحبّش "مبدئيا" تطلع أستاذ. صحيح البريبا تحلّك ٱفاق واسعة، أوسع برشا مالتعليم الثانوي و العالي، خاصة كي تتخصّص في اللغات و تكون مبادر و resourceful، لكن مبدئيّا هي تحضّرك تحضير أوّلي باش تكون أستاذ باهي.
3- ماتجيش للڤرجاني و انت مبلي بعدوّ المعرفة اللدود: الغرور. خاطر باش تتعب برشا و تتعب زملائك و أساتذتك، خاصة أنك باش تلقى روحك محاط ببارشا طلبة كيفك متفوقين في امتحان الباكالوريا و جايين الاولانين في ولاياتهم و معاهدهم. الجامعة بصفة عامة فصل جديد تنجّم "تكتب" فيه روحك من جديد بعيدا عن تقييمات الثانوي.
4- و أخيرا، ما تجيش للڤرجاني و نفسيتك هشّة. السيستام التنافسي (اللي موش بالضرورة صحّي) اللي موجود في المعاهد التحضيرية (مانحبش كلمة نخبة) بصفة عامة مالازموش قوّة خدمة بقدر ما لازمو قوّة نفسيّة و قوّة شخصية. الامتحانات اللي تتحطّ فيها أعصابك أصعب بياسر مالامتحانات اللي تعديها عالادب و التاريخ و الفلسفة و اللسانيات، و ماتنجح في الامتحان الثاني كان كي تجتاز الامتحان الاول بنجاح.
- إذا فهمت الحاجات هاذم، مرحبا بيك في قطعة التاريخ و التراث اللي قاعدة على قلوبهم مالقرن 19. عنّا الٱداب و اللغات و اللسانيات و الانسانيات. عنّا جو عائلي (موش متاع قناة نسمة) العلاقة فيه قليل وين تكون عمودية بالطريقة ا التقليدية بين الأساتذة و الطلبة. عنّا زاده وليّ صالح "سيدي المهدي" يحمي فينا مالعين (ترو ستوري). عنّا اكسبراس عم عبد الله في قهوة الزعزاع/الطبابليّة (أحسن اكسبراس في شمال أفريقيا).
هاكم تشوفوا، موش حارمينكم من حاجة. ماناقصنا كان طلبة "يحبّوا" يجيوا حذانا.
بالتوفيق لكلّ الناجحات و الناجحين في الباكالوريا. اختاروا بحب
